February 29, 2008

10 قراريط




زمان كانت ماما دائما بتقولنا المقولة الشهيرة للشيخ الشعراوى- الله يرحمه - إن كل واحد في الدنيا عنده 10 قراريط و إن كل البشر متساوين في عدد القراريط لكن مختلفين في طريقة تقسمها
فمن لدية 7 مال و 1 جمال و 2 صحة مثلا و أخر لدية 1 مال و 5 جمال و 2 أسرة سعيدة و 2 رضي و هكذا .
كنت صغيرة جدا عند سماعي قصة القراريط التي لم تتوقف امى عن ذكرها لنا لتزرع فينا صفة مهمة جداا إن تكون موجودة بالإنسان الرضي و القناعة و احسب ان قصة القراريط كان لها اثر جميل عليا شخصيا و لكن ما كان دوما يشغل بالى هو طريقة تقسيم قراريطي العشر .
فمع كل موقف أمر به أقول ده أكيد من القراريط فمثلا ان نجحت في شئ أقول يبقى انا عندي قيراط في الشئ دة و ان فشلت أقول يبقى قراريطي خالية من هذا الشئ
و تمر السنين و كل فترة بعد ان أستريح لفكرة معرفتي بقراريطي العشرة يظهر شئ جديد و يختلف مسار الحياة و تختلف شخصيتي و الظروف التى أعيش بها و ارجع مرة أخرى للبحث عن تقسيم قراريطي
و ها انا ذا هذة الايام اعيد النظر في التقسيم
الاعدة في البيت عاملة عندى نوع من عدم الاتزان بس ادتنى فرصة انى افكر في حجات كتيرة اوى و استرجع حياتى بس اكتشفت ان اهم عامل مشترك ما بين كل محاولاتي في تقسيم قراريطي و الى كان لية اكبر عدد النقاط هو الأسرة
ربنا سبحانه و تعالى انعم عليا بنعمة غالية اوى و هى أسرة سعيدة و متماسكة و دة بقى قليل اوى في الدنيا دى و الى بالتبعية اعانتنى انى اعمل بيت متماسك .
و انا مخطوبة لسا كنت بتكلم انا و زوجى – خطيبى وقتها – عن اهم العوامل الى تبنى بيت سعيد و بعد ما أتكلمنا على رضا ربنا سبحانه و تعالى و الاخذ بالأسباب و كدة قلتلو الحب الى هنجيبه من بيوتنا
بمعنى انا طوال عمرى عايشه في بيت يملؤه الحب قدامى دايما مثل حى عن الحياة الأسرية السليمة و قصة حب منتهتش حتى بعد وفاة بابا و فضلت ماما تحكى عنه علوطول قدام اخواتى الى ميفتكرهوش غير من الصور حكاوى حب كتب الكتاب ذى ما بيقولو اكنة ممتش و أكنها لسا متجوزاة امبارح و زوجى بردة عاش مع اهلة نفس قصة الحب و رغم بردة ان مامتة توفت من زمان الا ان نفس نبرة الحب بسمعها من حمايا لما بيتكلم عنها صعب ان اتنين يعيشوا الحب دة و يشوفو الوفاء دة كلة ميحولوش انهم يعملو بيت كدة 0
المهم نرجع لقراريطي لحسن موضوع الحب دة موضوع كبير ممكن ابقي أتكلم علية بعدين لوحدة
بعد ما فكرت في موضوع الأسرة اكتشفت انى في نعمة كبيرة اوى و هى نعمة الحب و الاستقرار و انى بتمتع بيها من زمان و دة رأس مالى بجد و كنزي الحقيقي
و تفضل الحياة دايما في تقلب مفيش حاجة بتستمر
و هتفضل حيرتي دائما ملازمانى يمكن يكون هو ده المغزى من الحكاية كلها و هو التفكر ثم الرضي و الشكر
مجهود كبير في التفكير ثم ابتسامة انى حتى لو مش عندى حاجة نفسى فيها هيفضل عندى حاجة مش عند غيرى ميزني بيها ربنا سبحانه و تعالى
و تنضم قصة القراريط العشر لليسته الحكاوي و الطقوس الى نفسي انقلها عن جدتي و امى لابني .

February 26, 2008

اجاهد حبى


مرت ثمانية أشهر على زواجنا
و كعادة كل شهر اشعر بمغص شديد يقلب مزاجي و يجعلني شديدة التوتر و الاستعداد للبكاء من ابسط الأشياء
طال المغص ولا شئ
حامل معقول
لأ انا مش هستعجل و أقول لحبيبي
المغص يزيد و إحساسى بالتوتر و قلبه المزاج مخلينى مش مستحملة حد يكلمني .
خلاص و انا مروحة من الشغل أول ما انزل من الباص اشترى التحليل المنزلي و أشوف آية النظام
مكتوب على الغلاف لو ظهرت العلامة الثانية يبقى فية حمل
طيب انا هعملو و هسيبو أقوم بقى ادعبس في الشقة كدة اخلص الى ورايا قبل ما قلبى يرجع من الشغل
اة نسيت التحليل
اية دة دا ظهر علامتين
ببلاهة واضحة معناه ايه ده


عدت ثلاث أيام و لم اخبر احد بموضوع التحليل المنزلي كانى لم اعرف شئ و قرر حبيبي ان الموضوع كده يستلزم بقى إننا ننزل نعمل تحليل
و شدني ذي الأطفال عشان ننزل – أصل الكبسة في الموضوع ده بتبقى وحشة


طيب حضرتك ممكن تروحو و تيجو بعد ساعة كده عشان تعرفو النتيجة
لا إحنا هنقعد لغاية ما النتيجة تظهر

يمر الوقت بطريقة تحرق الدم
اسمع اسمي
أتفضلوا النتيجة
شكلوا مكشر أكيد باينه
ايه مكتوب ايه
Positive
اعد على السلالم و ابتدئ نوبة من البكاء
يا ستى بقلك حامل
منا عارفة
طيب يا حبيبتي قومي نعد فى بيتنا براحتنا كدة الناس عمالة تتفرج علينا
لا انا مش هقوم – جوايا كم دموع لازم اخلصوا الأول

بعدها بيومين
عندك كام سنة و دة الحمل الكام و فيه اى تؤم في العيلة
24 و الأول لا مفيش
طيب دى شوية تحاليل عايزاكى تعمليها و أشوفك بعد 3 أسابيع
ايه دة هو انا مش هشوفة
هو مين ده
النونو
قومي روحي يا حبيبتي
و طول الطريق يضحك حبيبي عليا و يفهمني انه لسا ولا حاجة عشان تبان
و تمر الأسابيع ورا الأسابيع و كل مرة انا عايزة اشوفو بقى
و الرد المعتاد لسا
لغاية ما جت اللحظة إلى استنتها

أول مرة تعملي سونار
ايوا
طيب أنت عايزة ولدولا بنت
انا عايزة حد يريح قلبي و يدخل الجنة
و أخيرا شفتو
صغنون اقتحمنا علية خلوتو و كان شديد الانزعاج
إحنا كده اطمنا على القلب و كله تمام
طيب ينفع نستني شوية كمان
شوية اية أنت شايفة هو أخد جنب مش راضى يتحرك عشان ازعجناة ده حتى قافل رجلة مش عارفي نشوف ولد ولا بنت
طوال الطريق
عارف يا عيوني انا نفسي أجيب سونار فى البيت علشان اعد طول اليوم أراقب هو بيعمل ايه بجد حاسة أنى نفسي اعد متابعاه يا ترى تفتكره بيعمل اية طوال اليوم .
خلاص نبيع الشقة و نجيب سونار – يقولها حبيبي مازحا

طوال فترة الحمل لم اعرف اذا كان ولد ولا بنت لكن مع كل كشف تؤكد لى الطبيبة انه ولد لكثر حركته
و انا أرد مش مهم المهم يجى بقى ده وحشني آوى آوى
سعادة جميلة أول ما حسيت بأول حركة
و لغة عميقة و دافية اوى تكونت ما بيني و بينة فقط
بعرف امتى بيصحى و امتى بينام و امتى تكون الحركة دى بتاعت اللعب و امتى يركلني بغضب لما انسي نفسي و اعد طوال اليوم منغير ما أكل شئ
اجري بسرعة اكل حاجة مسكرة عشان ينعنش كدة و يرفصنى برجلة علامة على انة كلو تمام
فى كل لحظة هو معايا انا و بس
يقطع السونار جلساتنا المنفردة و كل الناس تتفرج على حركاتة الخاصة بيا
لكن هو يعلن ان محدش هيجبرو انه يعمل حاجة مش عايزها و يفضل طوال وقت السونار مستكين على وضع السجود مع ضم قدميه

و عديت ثماني أشهر و أسبوع بكل ما فيها بألمهما و لحظاتها الجميلة و جاء القرار بضرورة الإسراع فى الولادة قبل الميعاد

أنا نايمة على السرير فى اتجاه غرفة العمليات و ايديا الاثنين على بطني لا أحرك شفتي ولكنى أحرك أنامل يدي متحدثة آلية فى صمت
اطمئنة انها كلها لحظات و يخرج الى العالم الخرجى
لكى يستعد و يودع عالمة الخاص ليأتي إلى عالمي و حضني
بداخلي أحساسين
واحد عايزة اشوفة بقى و التانى دا خلاص هيطلع بره بطني و هنبتدى بالتدريج نبعد عن بعض .
كثيرة هى الأنوار فى غرفة العمليات
انت هتنامى و تصحي تلاقى النونو جنبك ان شاء الله
يلا
لا استنوا لما كل الرجالة الى فى الغرفة يطلعوا بره – ده كان اتفاقي مع الطبيبة ان يكون الطقم كله ستات و ان زوجي يدخل معايا الولادة
و بسبب الشرط الأول و اصرارى علية بعتو يجيبوه طبيبة التخدير من بيتها لان مكنش فية غير طبيب و مع ان الطبيبة دى تبقى زوجته الا انة أتغاظ جدا و منع زوجى من الدخول رغم ان طبيبتي قالت لة انها موافقة و ان زوجى طبيب بس هى كانت مسالة عند و حرمني من تواجد ملاكي و طبعا معرفناش نصور العملية فيديو و حرمني انى أشوف اللحظات الأولى لصغيري فى الدنيا – دى مشكلة الولادة القيصري بتحرم من متعة كبيرة .
المهم بعد ما اطمأنت ان كلوه تمام و كانت كلماتي الأخيرة للطبيبة
الله يخليك انا عايزه الجرح يبقى شكلوه جميل عشان انقتى تهمنى
يلا ننام
و قبل ما اقول يلا------------




فوقى جبتي ولد زى القمر
افتح عيوني لاجد نفسي فى غرفة غير غرفة العمليات مليانة سراير و أجد امى واقفة امامى عينيها كلها دموع مع ابتسامة – انا متخيلة يا امى حالتك كانت عاملة اذاى و انا فى العمليات - تسالنى بعض الأسئلة و أنا أرد بحركات وجهي فقط
حاسة ان نفسي بيروح منى
تخرج و يدخل حبيبي و يدخل معه الطبيب اياة
آنت عارفة مين ده
ده قلبى
ينظر الى الطبيب مندهشا
طيب كده تمام حمد لله على السلامة .
و شفتك يا حتة منى
اول ما شفتك فلتلك انت واحشني اوى يا حمزة
و من رحمة ربنا على الام الرضاعة
ان كان خرج من جوا بطنك بس هو لسا لصيق فيكى و مش عارف اى حد فى الدنيا الغريبة دى غيرك
لغتك و كلامك معة مش ناسية
عرفنى من صوت دقات قلبى و لمسة ايدى و ريحة جلدى
صغير قوى و جميل اوى اوى


كل يوم بيعدى بيكبر
ابتدى يعرف الناس و يضحك لحد غيرى
بقى عندو 6 شهور لازم ندخل اكل مع الرضاعة
يعنى هيبتدى التصاقه بيا يقل
لازم يخرج و يتعود على باباه عشان دة اول أخر فى حياته
بيخرجو هما الاتنين مع بعض
صحيح لوقت قصير جداا بس ساب حضنى و خرج لوحدة
كان جوا بطنى كل مكان معايا
طب لو جاع
مش مهم هجبلو بسكوت
انظر الية نظرة فرح بيكبر بس يعنى هو كدة خلاص بقيت مش مهم اكون موجودة علطول عشان الأكل

قربنا نكمل 8 شهور
يلا بقى عايزين نشوف امتى هينام فى غرفة لوحدة

فرحانة بية بس حاسة انى بجاهد حبى و انايتى كتير
لو عليا مش عايزة أبعده عن حضنى
بس هو كل يوم بيكبر و بيبعد عنى واحدة واحده
قاسى الاوى الاحساس دة
تحب لدرجة ان قلبك يوجعك و تجاهد نفسك عشان مش تخنق الى بتحبه
تفرح انة يعتمد على نفسه و يصعب عليك انة بيبعد عنك
العالم بتاعة بيزيد و مش بقيت انا العالم لوحدى
نفسى افضل محاوطة علية وانا بايدى الى بخرجه لبره لبعيد
ضحكته دى بتعتى انا و بس لكنى لازم اخلية يضحك للعالم كلة
بكرة يكبر و يحب و يتجوز و يسيب بتنا مش سريرة و بس

حاسة انى بعيط من دلوقتى عشان هيوحشنى

February 18, 2008

عيد زواجنا الثانى


عدت سنتين
سنتين و انا و انت مع بعض
سنتين بنام فيهم اخر الليل جوا حضنك
سنتين كل ما احس ان الدنيا مديانى ظهرها ابص ألقيك فتحلى ذراعك و ما بنهم كل الدنيا
سنتين و انت حبيبى و أبويا و صحبي قبل ما تكون زوجي
مرت سنتين و ربنا اهدانى فيهم هدية جميلة حتة منك عشان كل ما ابصلو أشوفك ادامى حتى لو انت مش موجود
مرت سنتين و كل لحظة بكتشف فيك حاجة جديدة و جميلة
مرت سنتين حتى لحظات الزعل فيها كانت حلوة عشان بعدها بعرف انت بتحبنى اد اية
مرت سنتين سعات كنا بنزعل من بعض بس بعد السنتين دول بعترف انى دايما ببقى السبب
مرت سنتين و حاسنة انى لسا زى ما انا مبكبرش لسا البنوتة الى شفتك اول مرة فى امتحنات اخر سنة فى الكلية
مرت سنتين حاسة انى عايشة فيهم قصة حب خيالية رغم صعوبة الحياة و كتر المسؤلية بس حاسة انك صحبى و ان الى بينا حاجة سر محدش يعرفها غيرنا
حاسة انى نفسى اخدك و نهرب بعيد
مرت سنتين خفت تنقلب بينا الايام و تكون حياة زوجية روتينية
بس الحياة يا حبيبى معاك مختلفة حاسة انى كسبت اللعبة و حليت اللغز
انا الوحيدة الى عرفاك كويس انا الوحيدة الى فكيت الشفرة
الناس كلها شيفينك بعيونهم هما و محدش فيهم شيفك بعيونى
حبيت في يوم زوجنا لا يوم ميلادنا انى اعمل نفس التفاصيل الى حصلت من سنتين
بس الفرق ان المرة دى معانا فرد ثالث مكنش فاهم فية اية بس كان عمال يضحك اوى اوى اكنة عارف ان النهردة فية فرح
لبست ابيض
و مليت البيت شموع
البالونات في كل مكان
و نفس ريحة المكان الى مش برشها غير مرة واحدة كل سنة عشان تبقى الريحة دى مميزة اوى لينا احنا الاتنين
نفس الموسيقى الهادية
اول ما دخلت البيت و مسكت أديا
افتكرت لما دخلنا من سنتين و كنت شايلنى و فضلت شيلنى كتير
و اذاى لما حبو يعملو فينا حركة و فتحو باب الشقة مرة واحدة رحت رمينى ع الارض _ مش هنسا شكل وشك لما اتخضيت
حاسة بنفس الفرح و القلق
حاسة بنفس الكسوف
دخلت بردو الاوضة اغير هدومى و انا جوايا الف إحساس
تمام ذى من سنتين






كل مرة في كل لمسة بحس انى معاك لأول مرة
و اخر الليل نمت في حضنك
كانى طول عمرة بنام في حضنك
من سنتين لما ختنى في حضنك لاول مرة حسيت انى أخيرا رجعت مكاني و بعد مدة قلتلى انا حاسس ان صورة وشك أطبعت على صدري

عمري ما حسيت بملل او ان اى حاجة ما بينا بقت متكررة
دايما بحس انى لسا عروسة و انى علطول بحبك

عديت سنتين
أحلى سنتين
لأحلى حبيبين
و صباحية مباركة