يا ترى !!

يا ترى الى حصل يوم 6 ابريل دة هيفتح عيون البصاصين على الفتيل الى اشعل الحرب

يا ترى ذى ما خططو من اكتر من 26 سنة او لا يمكن من قبل كدة من ايام عبد الناصر هيخططو اذاى يلاقو وسيلة يسدو الباب الجديد بيها يمكن يمنعو النت خالص من مصر لو الامر استدعى لدة

يا ترى هو الشعب بقى بالثقافة دى فعلا ولا اذى الحركة الى ابتديت من على النت وصلت لكل الشريحة دى و يمكن الامين منهم

يا ترى بجد تكون الحكومة ورا الى حصل فى المحلة علشان يغطو على احداث المحليات و علشان يحبطو اى خطوة جديدة للعصيان

يا ترى الام الى فقدت ابنها فى المحلة ممكن تخرج ابنها التانى للاعتصام الجاى ولا هتخاف علية و تحمية من الرصاصات المصرية الحية

و يا ترى باقى الامهات هيخافو على ابنائهم ولا هيخرجو هما بنفسهم يعلنو حالة العصيان

يا ترى الحكومة فعلا هتحول خوفها لاصلاح ولا لوحشية اكتر يمكن يبعتو يستوردو امن من الخارج زى الشركات الامريكية الى بتبعت الجنود للعراق

يا ترى نظيف الى مش نظيف افتكر انة بال 30 يوم الى صرفها للعمال الموضوع اتحل و الناس طلعت ماتت علشان 30 يوم

يا ترى الحكومة مخدتش بالها ان كل مصر كانت معتصمة ولا لازم المرة الجاية مصر كلها تتحرق علشان يتصرف للموظفين 30 يوم

يا ترى حسنى لما شاف صورتة واقعة على الارض و بتدوس عليها الجزم مفتكرش صور صدام

يا ترى جمال بيفكر فى اية دلوقتى فرصة يعمل حركة و يرضى بيها الشعب و يشيل ابوة و يصرف لكل مواطن كام شهر يسكت بيها الناس و بكدة يكون ضرب كل العصافير بحرق بلد واحدة

يا ترى اسراء الى محبوسة دلوقتى ندمت على الى عملتة ولا بالعكس الموضوع فى الاول كان مجرد فكرة مكنتش مستوعبة نجاحها و هى دلوقتى اكثر اصرارا

يا ترى الحلوين الى بيقولو الاخوان باعو الشعب مش متابعين كم المحاكمات العسكرية الى محاصرة الاخوان و كم الاعتصامات الى الاخوان

بيقدوها من شهور

يا ترى الحكومة هتلوم كل قطاعتها الى معرفتش تهمش الشباب كالخطة الموضوعة لكدة

يا ترى الى عدى علية يوم 6 كأنة يوم عادى من البلد دى صحيح ولا واخد حقنة مورفين من بتاعت الحزب الوطنى الى أعلن و منتهى العزة ان العاصفة الصفراء هى سبب الاعتصام و كلة تمام يا ريس