يا ليلة العيد

في مرة بعد موت أبى بكذا عام امى اتفقت على خروف كالعادة عشان يدبح فى العيد فوجأنا ان الرجال جاى و جايب الخروف قبل العيد بيوم و مشى و سابوه فى البيت فضلنا طول الليل قافلين على نفسنا الأبواب فى انتظار خالى فى الصباح خوفا من الخروف الى كسر الشقة كلها فى الخارج
حتى ألان و مع ليلة كل عيد أشم رائحة اللبس الجديد
يؤلمني جدا من يعتبرني قد كبرت ولا يعطني العدية
كل ما اكلم حد و يقلى كل سنة و أنت طيبة أقول أنت عارف رندة السنة دى بتحج ( و الكل مين رندة ؟

اشتاق الى صلاة العيد فى ساحة مسجد السلام ثم التجمع امام مسجد الشربينى و الإفطار عند عمو مصطفى
كل ليلة العيد بنام و جوايا أمنية ان أيد أبى هى الى تصحينى و يحضني حضن كبير اوى ذى ما كان كل عيد بيعمل و يقولى كل سنة و انت طيبة يا حبيبتى
العيد الصغير الى فات كان ابنى عندة 4 شهور حاولت جاهدة انى اعمل كل طقوس العيد الى كانت بتحصل فى بيتنا لانها سابت جوايا ذكريات جميلة نفسى ابنى يحتفظ بيها
يزلزلنى تكبير المسلمين
بستني الأعياد و رمضان عشان أشوف اهلى و اقربائى الى مشاغل الحياة بتمنعنا من اللقاء
نفسى اسافر بورسعيد اعد كام يوم هناك
قررت انى فى العيد اخرج أتعشى فى يخت انا و محمد و حمزة و حبيبة و خطيبها
طول يوم عرفة ببقى مشغلا التلفزيون و بتفرج على مناسك الحج و علطول بعيط وقت اذان المغرب بتشحتف اوى فى اليوم دة
رمضان بيجى و الاعياد بتيجى بس فين الفرحة بتاعت زمان احنا كبرنا ولا الزمن هو الى اتغير اوى كدة

كل سنة و ماما فى أحسن حال
كل سنة و حبيبي دايما بيحبنى
كل سنة و حمزة بيكبر
كل سنة و ذكرياتي الجميلة عايشه جوايا
كل سنة و مستقبلنا يملؤه الخير
كل سنة و المسلمين كلهم طيبين
كل سنة و أنت طيب يا بابا

يسعد صباحك

استوقفني تعبيره أنة كائن صباحي
يستيقظ فى الصباح الباكر و هو فى قمة نشاطه و الابتسامة تعلو وجهوه
و قد بداء الحديث بدهشته الشديدة من الضيق الواضح على كل صباح
و عدم القدرة على التحدث او الاستيعاب الا بعد تناول كوب عملاق من الشاي بلبن
و قطعة من الشيكولاتة
بس انت مش بتحبى تصهري كمان
اة فعلا انا بعد الساعة 1 مساء بهنج

أمال بتفوقي امتى اذا كنت لا كائن ليلى ولا صباحى

!
نظرة طويلة لسقف الغرفة
تصطحبها ابتسامة لولبية فى اتجاة الساعة المعلقة على الجدران
يظهر أنى أنا كائن بعد العصر كده بشوية

أشباه الأسود

بيعصبنى اوى الأسد و هو مستني اللبوة أنها هى الى تجيب الأكل و هو اعد ملك
مكتفى انة الملك و ان هو دة دورها الى لازم يتعمل

للأسف كثرت فى حياتنا اشباة الأسود

على الهامش انا بحثت لقيت اسمها لبوه او أسدة عشان الناس الى مركزين اوى فى العربي بتاعى

Message in a bottle

أمبارح كنت بتفرج لأول مرة على الفيلم دة , غريبة أنى مشفتهوش قبل كدة.

بس عموما هو من أنواع افلامى المفضلة .
بحب نوع الرومانسية الى عرضها الفيلم , الإحداث دى ديما بتعيشنى فى حالة بتفضل موجودة معايا لفترة من الوقت . مش عارفة ليه دايما الإحساس بالحب و الرومانسية بصيبنا دايما بالاكتئاب ، مع أنى ببقي سعيدة جدا و خصوصا لو أنا إلى عايشه حالة الحب دى بس دايما بحس أنى و انا فى اكثر أوقات الصبابة بيتسلل الى حالة مزاجية غريبة دة مش نكد على فكرة انا بعرف استمتع جداا بحالة الحب بس أظن لان الحب بيبقى اعلى من مستوى احتمال القلب لة عشان كدة بتعب
الفلم يعتمد على القدر فى جمع الأشخاص على شاكلة فيلم you have got a mail
كل واحد فينا من وقت اداركة للحياة و هو بيعيش مع نفسة فى حلم و بيكبر الحلم و بتتغير كتير من ملامحة فى كل لحظ بنكبر احنا فيها و بنيجى فى وقت معين بيلح الحلم دة علينا اوى و بنبقى طول الطريق بندور علية بعيوننا عشان نلاقية او نكون موجودين فى كدر الصور يمكن نطلع . احسب ان الأحلام كلها بتدور حوالين محور واحد الحب بكل انواعة و اشكالة و طرقة .
كانت بتمارس حياتها العادية و بتجرى الصبح ( يا بختها ) لما القدر حط ادمها ازازة حاجة عادية كان ممكن تكون ادام اى حد فينا و ميهتمش انة يفتحها
و لما اتفتحت لقت بين سطورها فك شفرة حلمها و مجرد الكلمات دى كانت كفيلة لتحريك حجات كتيرة اوى جواها
يا ترى هى الكلمات فعلا كفيلة لفك شفرتنا ولا كل واحد فينا مفتاحو مختلف عن التانى و يا ترى عشان الى ادمنا بيعرف يكتب يبقى بجد هو دة الى جواة .
و هو فى حالة الحزن تقدر الكلمات مهما كانت كتيرة توصل للحبيب الغايب مدى الحب و الحزن و الوحدة الى الواحد بيبقى عايش فيها
هى فتحت الرسالة و هى لقت الهدف الى يخليها تجرى و تدور على صاحب المفتاح و هى قبلتو و لقت عندو الى هى عايزاة و فى النهاية هى بردو الى ضيعتو
يا ترى احنا ضيعنا كام حبيب من ايدينا ضيعنا كام لحظة حلوة كانت ممكن تبقى ذكرى نصبر نفسنا بيها لغاية اللقاء عشان حجات متستهلش خصرنا مين و جرحنا اد اية الموضوع مش بجرد واحد ووحدة بيحبو بعض بس مش عارفة لية افتكرت حجات كتيرة اوى و انا بتفرج على الفيلم وبكيت لحد النواح و انا بشوف البطلة بتتفرج زى زيها على النهاية ....

افتكرت أبى .
افتكرتو جداااا و جت ادام عينى ومضات كتيرة اوى بسرعة خلتنى اضحك اضحك اوى و فى الاخر انتهت ذى ما كل حاجة بتنتهى بعياط و ندم على لحظات كتيرة فاتت و لما البطلة فتحت اخر رسالة كان البطل كتبها فى الفيلم عينى وقعت على صورة حبيبى الرجل الثانى فى حياتى بعد ابى ( الله يرحمة ) و اذاى فى لحظة القدر جمعنا و حسيت ان فية حاجة بتربطنى بية .
حاجة من زمان يمكن من قبل خلق البشر افتكرت اول لمسة و اول ضمة اذاى خدتنى و وودتنى فى عالم تانى ملوش حدود ولا جازبية تشدك لتحت .
و اتكسفت من نفسى اوى و انا بفتكر كل مرة زعلتو فيها و طلعت منى ضحكة بصوت طفولى و انا بقول ايوا بزعلو عشان بحبو بغير علية و بتجنن لما بحس انة بعيد عنى ولو للحظة و بسلم كل اسلحتى من اول نظرة شايلة الدفا الموجود فى الدنيا كلها .
اكيد البطلة ندمت على انها ضيعتو من اديها و ندمت اكتر انها مسبتش عندو رصيد من الحب كان كافى انة يشفعلها عندو فى وقت الزعل .
و فى لحظة نطيت من مكانى عشان اعرف الحساب
دخل عليا لقى الدموع مليا عنيا سألنى بتعملى اية قلتلو عايزة اعرف رصيدى اد اية
مسك اديا و بصلى كتير اوى ضاعت معاها عقارب الساعة و قالى ........
قالى يا عمرى انت منى رصيدك من زمان موجود من قبل ما اشوفك كان بيزيد مع كل مرة بحلم بيكى فيها من وقت ما ابتديت احلم
قلتلو خايفة يقل
قالى يقل اذاى و انا بتنفسك

خلص الفيلم مع نهاية اخر حرف فى كلامة
و لقتنى باخد نفس عميق اوى

انا كمان عايزة اتنفسك

هو بيعمل كدة اذاى!

بالأمس

بالأمس كنت كالطفل الذي أعلن حالة الفرح
بالأمس قطعت الحداد و أعلنت حالة الفرح
بالأمس كنت كالطفلة التي تركو لها الألوان لترسم بها على الجداران

ملحوظة

ربنا يخليك ليا

أسفة

آسفة
كان حوار قاسى اوى
كان نفسي أخدك فى حضني و أقلك متزعلش
كل كلمة قلتها انا عارفة انها كانت بتوجعك
بس و الله بحبك اوى
كل كلمة كانت لازم عشان الحب يستمر
بس لازم سعات نأسى عشان خاطر الى بنحبهم
بحبك يا كل عمري

أية

أعت اقلب في صفحات المنتدى القديمة ، حنين غريب بيربتنى بالمكان دة مع ان مبقاش خلاص فية اى صلة بينى و بينة حاولت كتير أقاطعة بس كنت دايما بتسلل من نفسى و ألقى علية نظرة لغاية ما خت قرار انى مشاركش فية بس أبقى دايما متابعة أحداثة
عموما مفتنيش كتير لانك ممكن تعد بالشهور متشفش اى حدث جديد حصل فية لا الناس بقو الناس ولا المنتدى لسا محتفظ برونقو
كانت حياتنا كلها بتدور فى فلك واحد حوالين صفحات المنتدى فى المسجد و الكلية و فى التليفون كان اغلب حدثنا عنة و عن اعضائة و مواضيعه أصدقاء كتير اوى عرفتهم من المنتدى و رغم ان كل واحد فينا بقى بعيد و هجرنا المنتدى بس لسا لغاية دلوقتى صداقتنا ذى ما هى و لله الحمد
اية واحدة من الناس الى عرفتها من المنتدى بنت عسولة كتبت موضوع محدش فهم منة حاجة خالص هى نفسها لو قراتة دلوقتى مش هتفهم هى كانت عايزة تقول فية اية و انقلب الموضوع من شكوى من موقف صعب حصلها لنكتة التف حواليها كل اعضاء المنتدى و لقيت نفسى بدافع عنها و بضحك فى نفس الوقت و عرفت انها معانا فى الجامعة بس فى كلية تانية و عادى أتقابلنا و نفس الترتيب الى عرفت بية ناس من المنتدى لغاية ما بنبقى اخوات فى الله
قابلتها بعدها بكام اسبوع كنا فى رمضان ووعتها انى هزرها مرة فى البيت بس محددتش معاد و لقيت نفسى تانى يوم العيد بتصل بيها و بستاذن فى الزيارة
و كانت ...
ابتديت علاقة من نوع غريب هى اساسا بنوتة من نوع مميز كانت جواها برائة نوعها قليل لما تقابلها و تشفها فى حد مش معنى كدة انها دلوقتى مش بريئة بس محدش فينا بيفضل على حالة
نرجع للبرائة بنوتة حبا الحياة اوى و منفتحة على العالم كلة بس من جواها بتدور على حاجة و يظهر انى انا كمان فى الوقت دة كنت بدور على حاجة و انا مش واخدة بالى يمكن بعد كل المدة دى مش عارفة احط ايدى عليها اوى
يمكن كنت بدور على حضن او نظرة فى عنيها شدتنى ليها مش عارفة بس هى عندها قدرة رائعة على الاحتواء
احتواء الام و انا اعنى الكلمة دى جدا
و يظهر انها لقت فيا حاجة هى كمان كانت بدور عليها و من اللحظة دى ابتدت قصة صداقة و اخوة فى الله ملكت الكتابة عندى فقيرة جدا على انها توصفها
و الامور كانت ماشية بطريقة خلت الناس كلها تلتفت و تركز معانا و كنا حديث المدينة زى ما بيقولو انا نفسى كنت مستغربانى لانى مش من الشخصيات الى ممكن تتعلق بحد لحد اللزقة كدة لانى مهما كنت بحب مش بسمح لحد انة يقرب من خطوتي الحمرا
المهم ابتدت الضربات تدخل ورا بعض و كنت فى كل ضربة من دول اقول لا يمكن هنقدر نبص فى وش بعض تانى و كانت بتعدى و بعد مدة لو سالتنى اية الى حصل هالك مش فاكرة كانت مشكلة جامدة اوى و اتحلت و الحقيقة هى كان ليها الفضل بعد ربنا انها دايما تجمع الشمل انا بعترف بكدة بس يظهر ان الحب لما بيزيد اوى كدة بيكون فوق احتمال قلوب البشر
اتعرضنا لهزة جامدة اوى كل واحد فينا كان بيجرى فى طريق فى محاولة لانقاذ ما يمكن انقاذة من صداقة واشكه على الانهيار
و بعدت اية و سافرت بعيد ....
سنتين و رجعت مصر تانى شفنا بعض كام مرةوسط ناس كتيرة بس اكن جدران من الفولاذ كانت تفصل بينا بعد لما كنت بشفها كنت بحس ان غضب الدنيا كلها مالكنى و اول ما تمشى و تدينى ظهرها كنت بحس بحنين الدنيا كلها بين ضلوعي لو شفت الموبيل بيرن و اسمها مكتوب كنت بحس ان مليون عفريت بيتنطتو ادامى و بعدين اعد مكتئبة كام يوم لانى نفسى اسمع صوتها ( شزوفرنيا صح عادى)

المهم ان حصل حاجة كدة خلتنا نرجع نتكلم تانى و فجاءة ابتدى الفولاذ فى الزوابان و الدنيا اتحسنت كتير بس يظهر ان اثار السنين هتفضل معلمة جوانا
يا رب الاثار تروح
بس لا انا الى كنت زمان ولا هى نفس البنوتة بتاعت زمان ولا الظروف الى كانت زمان مسعدانا اننا نقرب كدة لسا موجودة
أية متعر فش انى هكتب عنها هى متعر فش أساسا انى عندي blog
بس انا بكتب عشان حسيت انى عايزة اكتب
وحشتني شقة مصر الجديدة
ووحشتنى البلكونة الصغيرة
وحشتنى البيتزا
وحشتنى مكالمتنا الى الجران كانو بيتلمو على صوتنا فيها
وحشنى جنانك
وحشنى nuts & nuts

وحشتنى السواقة بدون هدف
وحشنى جنونى
انا وحشتني نفسى
ووحشتينى فكتبت
و بس

من أجلك 1

من أجلك طمست ملامحي
( و يا ريتو طمر )
أصبحت محاولاتي البائسة لرسم وجه جديد شئ يصيب دهشتك
( كأنك عرفتني كده وضعفي نحيتك بقى حق مكتسب )
أحببتك نعم احبك اجل ولكنى في النهاية بشر
( لازم أكون نفسي عشان الحب يستمر )
نسيت او تناسيت من أكون و كيف كنت منذ قبل
( نسيت يا حبيبي أنى بعت كله بس لك )
معتمد ان حبك اقوي من اى حد
اسمحلى أقلك hard luck

كسرة الانتصار

جلست انا و هى وحدنا فى بيتها بعد رجوعها الية أثر اجراء عملية جراحية أستأصلت فيها جزء من جسدها بسبب المرض اللعين و أخذت تحكى لى ومضات من حياتها منذ الطفولة مرورا بالجامعة و زواجها الاول و ظروف طلاقها ثم زواجها الثانى الذى تعتبرة اكبر نعمة من الله عز و جل عليها و انه مهما حدث لها حتى لو كان استأصال جزء من جسدها لا يوافى حق الله و شكرة على ذاك الزوج الحنون

و اخرجت من جوارها صندوق ملئ بالصور

هذة هى كم كانت جميلة و رقيقة و هؤلاء اخواتها و هنا مع امها هذة الصورة تبدو فيها شاحبة اة انها اخر فترة فى زواجها الاول ثم تعود الاشراقة و بقوة فى باقى الصور و بجوارها حبيب عمرها
ثم اخرجت من مخباء سرى فى العلبة ورقة جرنال صفراء يدل لونها على مرور مدة كبيرة على صدورها و ذهبت بعيد بعينيها و هى تفتح الورقة اظنها ذهبت الى يوم صدورها و انقلبت ملامح وجها من وجة ضحوك رغم المرض يحكى ذكريات عمرها الى وجة يعلوة المرارة و قبح ذكرى اليمة
سالتها ما تلك الورقة ؟
قالت انها الجريدة التى نشر بها خبر زواج زوجها بصديقة عمرها
استيقظت فى الصباح كاى صباح لم تجدة بجوارها ووجدت من بعث لها بجريدة وجدت بين صفحاتها صدمة عمرها خيانة الزوج و الصديقة
كنت اعرف القصة جيدا من قبل و لم يكن الامر سرا الكل كان يعرف الحقيقة حتى زوجها الثانى و حبيب عمرها و مضت على تلك الاحداث سنين طويلة جدا
و لكن تعجبى كان بسبب احتفاظها بتلك الجريدة كل تلك السنين لما و هى التى طالما قالت ان الحياة كانت عصيبة معة حتى و ان لم يخنها ان قلبها لم يدق الا مع حبيبها و زوجها الحالى
سالتها لم تحتفظى بها ؟ ابعد كل هذة السنين ماذالت عينيك تدمع و انت تقراءيها؟
لم ترد على
و بعد مرور اربعة ايام استيقظت صباحا على خبر وفاتها
.................................................................
الخيانة
مش ضرورى الخيانة دايما تكون بالصورة القاصية دى او حتى تكون بس بين حبيب و حبيبتة ممكن تكون بين الاخوات و الاصدقاء
الخيانة ان الكسرة تكون من اقرب الناس اليك الى تكون عايش طول حياتك عارف كويس اوى انك يوم ما تتجرح هتروح و تترمى فى حضنهم
لما الناس دول بالذات يخنوك هيفضل اية تانى فى الدنيا لية امان
الست لما بتتجرح من الانسان الى بتحبو مفيش اى حاجة تانى فى الدنيا ممكن تمحو اثر الجرح مهما طالت السنين حتى ولو حبت حب جديد و حتى لو كانت ذى بطلت قصتى لو كانت بتحمد ربنا كل لحظة انة خلصها من القديم ورزقها فوق ما كانت بتحلم
المشكلة مش انها بتحب و مش قادرة تنساة لا الموضوع مختلف ممكن يكون الشخص الى خان دة ولا يفرق معاها بس تفضل حاجة موجودة جوا كل ست مش عارفة الرجالة يفهموها ولا لاءة بس اظن ان هرمونات الانوثة هى المسؤلة عنها
حاجة بتخليها تفضل طول عمرها منتظرة لحظة واحدة
هى لحظة
تشوف فيها نظرة الانكسار و الندم نظرة بتحمل الف حسرة نظرة حقد للحب الحالى
و بس
دى الحاجة الوحيدة الى ممكن تصلح الشرخ مش بس كدة لا دى كمان تمحو الذكرى و تقطع الصفحة خالص من حياتها كأنها لم تكن
دى مش خيانة للحبيب الحالى بس احسب انها حاجة فى جينات الانثى
عارفين اية اكبر مأسى الخيانة
ان مهما ربنا رزق الواحد بعد كدة بحياة مستقرة و حب بالدنيا و ما فيها بتفضل حاجة بشرية دايما تعمل شرارة من بعيد ضوء انظار ضعيف بس بيحمل سؤال
تضمنى منين الامان؟
لى صديقة دايما بتقلى انا مستغرباكى اوى انك مش بتعرفى تسامحى
بقلها اذاى و انا قل ما بقول سامحت و هما بشرغلطوا و خلاص
يظهر النور من بعيد دة مش شعاع نور واحد دى عشرات تفكرنى دايما بخيانة اقرب الناس ليها و تفكرنى بالى كان
يا صدقتى اطفى الانوار دى و انا اعرف اسامح
...............................................
تكملة للقصة بعد موت بطلتها توفى حبيبها بعدها ب خمسة اشهر لم يحتمل الم الفراق و دفن بجوارها عسى ان يكون البلسم الشافى لجراحها
رحمهما الله

بتتكلمو كتير

أنتو لية بتتكلمو كتر ؟

سؤال دايما أغلب الرجالة بيسألوة و هما مستأين جدا

و كأن الموضوع دة مأزمهم اوى او ان الكلام صفة مش عندهم

مع ان الرجالة بردو و حتى النوع الصامت منهم بيتكلم كتير

و كل شاب و هو بيكلمك على حبيبة و شريكة المستقبل بياخدو الكلام و يسرح بعيد و تلمع عيونة و يقلك انا نفسى الاقى واحدة تعرف تسمعنى و تستوعبنى و تفهمنى

يعنى نفسو يفضفض و يحكى قصصة الى محوشها بقالو سنين

طب لية بقى بتشتكو لما الستات بتتكلم كتير

على فكرة دة مش هجوم على الرجالة بالعكس دى فرصة لتوضيح ولو جانب واحد للاسباب الثرثرة النسائى

ايوا لان الكلام لية اكتر من جانب و موقف

و هتكلم المرة دى على الكلام بين الازواج

الزوج المنهك من العمل بيبقى مش طايق حد يكلمو و تلاقية بيألك دى اعدت تكلمنى لغاية ما كلت ودانى

فى حالة ان الزوجة مش بتشتغل

ما انت يا حضرت الزوج المحترم لازم تراعى انها واحدة اعدة فى البيت طول اليوم لوحدها حتى لو عندها عيال فى كلام الواحد ميعرفش يتكلمو مع العيال و فى حالة ان مرات حضرتك كانت بتشتغل مثلا و اعدت فى البيت عشانك و عشان اولادك انت لازم تقدر الحالة النفسية الى هى بقت فيها

دى واحدة كانت ليها حياتها الخاصة بتروح و بتيجى بتشتغل و بتنج محور اهتمام و اعجاب ناس كتيرة اوى بتحلم و بتحقق جزء من احلامها بتحتك بالناس فبتالى عايشة فى الدنيا و عارفة كويس اوى اية الى بيحصل و متابعاة

جيت جضرتك و جة ابن او بنت حضرتك بكل حب و لو لفترة صغير بتسيب كل دة عشنكم

يعنى احتككها بالعلم الخارجي كلة انتهى حتى لو كل يوم بتكلم حد فى التليفون و لو بتقراء كل الجرايد بس الاحتكاك الحقيقى انتهى

بقيت انت عالمها و مصدر معلومتها

:)ليها مين غيرك تسألو و تفهم منو لا و تتغابى عشان تشرحلها تانى

بتقول انت تعبت من وجع دماغك طول اليوم فى الشغل طب وهى !

يعنى هى مستهلش انك تدوس على نفسك شوية اكن سعات الشغل زادت شوية

اصل بالعقل كدة اذا مكنتش انت المعلم يبقى البديهى هتدور على معلم اخر و الله اعلم مش كل الستات فى العصر الى احنا فية ممكن تحصن نفسها بالشكل المفروض

الفراغ الفراغ الفراغ

سلاح قاتل ما بيحسش بية غير الى جواة

تاكل ودانك احسن ما تندم بعدين

دة مش تهديد بس هو صورة للى بيحصل

استحمل كلمها و حسسها بالاهتمام

و لو قالتلك على مشكلة متتسرعش بالحل هى عايزة تحكى و بس و انت تسمع و فى الاخر

ضمها اوى و قلها انا عارف ان انت بتتعبى اوى منغيرك مش عارف كنت عملت اية

صدقنى

كلة هيروح و هتقعد اليل كلة و النهار الى بعدة حاسة بدفء الحضن و لمسة ايدك و سعتها هتقول

دة بيتعب اوى فى الشغل الله يعينو

ليك مين غرها عشان يدعيلك بالحب دة

الحقيقة

أحساس مؤلم أوى لما تحس ان الدنيا ماشية و الناس كلها ماشية معاها و انت الوحيد الى واقف مع انك كنت سابق كل الناس دى

و تقف فجاءة تبص وراك متلقيش اى حد من الى تعرفهم و نلاقى تفسك عشان بقيت فى الديل متطر انك تتعرف على ناس اقل منك لان الى تعرفهم سبقوك

و ترجع تكلم حد من الى فوق يكلموك ذى ما كان طول عمرهم بيكلموك و تعد طول المكلمة مش عارف هى بتوجة الكلام ليك ولا لشبح جاى من الماضى البعيد و مع شوية تركيز تتفاجاء ان الكلام فعلا ليك هما لية لسا بيكلمونى كدة هما ميعرفوش اخبارى الجديدة مع انى حاسة ان العالم كلة بيصرخ بالحقيقة

هى فين الحقيقة

لما تحس انك الوحيد الى عارف الحقيقة و العالم كلة مش عايز يصدقها

مين الى كان يصدق ان الى كان فى المقدمة فجاءة يبقى بعييد اوى اوى

و تفضل تضغط على نفسك و تحاول تشد يمكن تلحق او حد يمدلك ادية بس ترجع تقف تانى اصل بجد مينفعش انت مش انت ولا رجليك عارفة تشيلك و تساعدك

و يرجعو تانى يكلموك و ينفخوك

لغاية ما تيجى لحظة تصرخ فيها و تقول سبونى بقى انتو بتزودو احساسى بالعجز لا انا الى كنتو تعرفوة ولا انتم الى كنت اعرفكم

سبونى ادخل فى قوقعتى هى ادرى بحالى و محتويانى و عارفة حقيقتى و حجمى

انا بجد تعبت و قررت انى اقول الحقيقة الى لازم الكل يعرفها منغير ما أفكر مين هيقراء و مين هيقول اية هقول الى انا عايزاة لانى عايزة اقول و لانى انا بقيت كدة

مع احترامى للجميع انا بقيت كدة