انا : نفس الى بيحرق دمى كل مرة
نفسى : مفيش فايدة مفيش حاجة هتتغير
انا : بدور بسرعة جوا دماغى على كلام اقولة
نفسى : خلى بالك اوعى تقولى كلمة تجرح
انا : ينزل على الصمت الرهيب و عنيا ثابتة على اى حاجة
نفسى : الى قال ان الراجل ممكن يتغير دة حمار
انا : اقوم و اروح مكان تانى و شوية البيت كلة يفضى عليا
نفسى : يرتفع صوتها بعد ما اطمنت انها بقت لوحدها و تفضل تقول فى كلام لغاية ما بطنى ترتفع ادامى 3 متر معلنة عن تورم قولونى
و نفس الاسطوانة بتاعت كل مرة لانها نفس المشكلة كل المرة و الى للامانة اكتشفتها من اول يوم و ارتضيت بيها بعد ما هى نفسى قالتلى انها ممكن التعامل معاها
انا : انا عارفة ان ممكن التعامل معها و بصبر فى اغلب المرات بس سعات مش بقدر بجد
نفسى : مهى حاجة تغيظ حاجة مستفزة لالالالالالالالالالالا انا المرة دى لازم اخد موقف
كل مرة برجع عن موقفى و لوحدى منغير ما يحس انى اساسا كنت زعلانة و انسى فى ثوانى و الموقف يعدى و لو حصل حاجة من جديد ارجع اتشحن تانى من جديد و انسى اية الى كان حصل قبل كدة بس افتكر انى متغاظة
انا : خلاص المرة دى هى المرة دى فاااااصلة
المية نازلة سخنة مولعة على كتفى لدرجة انة لونة احمر
دخان البخور طالع مع دخان المية السخنة و مالى المكان
صوت الست طالع من المول الى تحت البيت
حيرت قلبى معاك وانا بدارى واخبى
قولى اعمل ايه وياك ولا اعمل ايه ويا قلبى
بدى اشكيلك من نار حبى
بدى احكيلك على اللى فى قلبى
واقولك على اللى سهرنى
واقولك على اللى بكانى
واصورلك ضنا روحى
وعزة نفسى منعانى
واقفة ادام المراية الكبيرة امسح اثر البخار
و اقراء ما كنت كتبتة من يومين عليها
احسد نفسى لانك حبيبى
و اقول لا عزت نفس ولا حاجة
و هو معملش حاجة تزعل
هو بس الموضوع ان هو كدة طبيعتة كدة
يمكن طيب زيادة على الزوم
يمكن بيجى على نفسة لدرجة انة بيصعب عليا بدرجة تعصبنى
يمكن ضارب الدنيا طبنجة
كل الحجات دى توحفة و نعمة بس فى مواقف كتيرة بتعصبنى و بتحرق دمى
تقيل اوى و راسى
اخرج البس و اطلع الشحنة الى جوايا فى الماك اب لقيت نفسى بحط الوان صارخة اوى و تقيله اوى زى الغوازى و لزوم الماكب مكنش فية مفر غير لبس جلبية زى بتاعت الست نانسى
الساعة بقت 12
و باب الشقة بيتفتح
السلام عليكم و معاها وقفة و نظرة
اصل فى الطبيعى السلام معاه بوسة و حضن بس هو عايز يشوف المود
عليكم السلام
يعد جنبى على الكنبة
صمت
صمت
صمت
يمد ايدة يجيب الريموت
يلمس جلدى
يخرب بيت الكهربا
و بعدين بقى
احط العشا و اطمن ان كلة تمام و اقلة انا هنام تصبح على خير
على السرير نايمة و يدخل تحت الغطا
ولاننا متفقين ان مهما حصل حضننا لبعض وقت النوم ملوش دعوة بحاجة
لانة كان بيقول لازم كل يوم بليل ترجعى لمكانك
جوا حضنة و بين ضلوعة
و يمد ايدة
و اروح و انا بتحاشة عيونة
و ادفن راسى جوا حضنة و نفسى عمالة تسمعنى
الموقف
متنسيش
خدى بالك
و زى كل مرة اسلم
و انسى فى لحظة
و يستخبى الغيظ
و تنزل بطنى لحجمها الطبيعى
و يفضل الحال على ما هو علية
و هو مش هيتغير اصل هو كدة
و مينفعش يكون غير كدة
و لو كنت حبيت واحد مش كدة مكناش هنعرف نعيش مع بعض شهر على بعضة
لانة علشان هو كدة مستحملنى على كدة
ربنا يخلهولى و يرحم قولونى الى ورم
24 comments:
"ولاننا متفقين ان مهما حصل حضننا لبعض وقت النوم ملوش دعوة بحاجة
لانة كان بيقول لازم كل يوم بليل ترجعى لمكانك
جوا حضنة و بين ضلوعة"
ما شاء الله لا قوة إلا بالله
هنيئاً لبطلة المقالة بزوجها.وهنيئاً له بزوجته. فمادام ذاك الرباط بينهما لن يقف أمامهما شيء
طالما هي تعود لمكانها
وهو يوفر لها ذاك المكان
سيدتي...أمتعتيني
إحترامي وتقديري
الله
بجد الكلام حلو أوي
عزيزتى
الاسطر الثلاث الاخيرة هى الخلاصة
بالعامية بقى اللى يحب انسان يحب عيوبه معاه وميفكرش يغيرة
اللى شب على شئ بيشيب علية وما كنت ترينة عيب اكتشفت انه ميزة
تعرفى حماتى قالت لى( يابنتى السرير بيحل اى مشكلة
ومتحولوش مهما حصل لازم ترجعوا لحضن بعض وكان عندها كل الحق الله يرحمها
ربنا يهنيكى ويخليكوا لبعض
طيب ما انتي فاهماه أهو
أمال عاملة نفسك مش فاهمة ليه :)
ظالماه انتي كده دايما
ارجعي مكانك بقى واقعدي ساكتة
ربنا يسعدك في الدنيا والآخرة يارب
ما شاء الله ما شاء الله
ربنا يكملك بعقلك يا حبيبتي
وطبعا انا كنت مبلمة من جمال وحلاوة الكلام والأسلوب
بجد ما خرج من القلب يصل للقلب
ربنا يارب يسعدك ويهنيك ويرضيك
ويهديلك ما به من نفسه من غير ما تحاولي أصلا
حكاية قولونك دي فكرتني بأياااااااااااام
وحشتيني يا بنت
whispers
نورت البلوج فعلا
عجبنى كلامك
طالما هى تعود لمكانها
و هو يوفر لها ذاك المكان
بتلخص الادوار المتبادلة
اسعدنى مرورك
امرأة تقول الذى لا يقال
اذيك يا دودى
يسعدنى ان دة يكون راى واحدة مبدعة
بجد اسعدنى مرورك
nouna
الله يرحمها عندها حق طبعا
و الى بيشوفو عيب ممكن حد تانى يشوفو ميزة و القضية هو ان العيب دة ممكن التعامل معاة و احتمالة ولا لاءة
علشان كدة مشروع بنك الحب دة مهم
علشان الحياة تستمر بالحب لازم الواحد يبقى عندة رصيد يسحب منة فى اوقات المشاحنات لو مفيش رصيد يبقى مفيش حياة
نورتينى
يوم جديد
مين الى قال انى مش فاهماة
الام بتبقى حفظة اولادها و عارفة مفتاح كل واحد بس سعات مش بتقدر و تخرج عن شعورها
هى خواطر
و تذكرة علشان الواحد مينساش
اين جديدك؟
الست مرجانة
اقصد اندلس
فاكرة
لسا ذى ما هو لما بيورم تفتكرى اننا حامل فى السادس
قبل ما احمل فى حمزة و الله كانو فى الشغل بيفتكرو اننا حامل و مخبية عليهم لو قولونى ضرب
و اجى تانى يوم بطنى نازلة الناس يجلها استبحس
انت اكتر واحدة بسعد ان الكلام عجبك و الاسلوب
و بحس ان بكدة فية امل
كفارة انك طلعتى من مارس على خير
مارس الجى يبقى فية حجات صغيرة كدة تصدعنا ان شاء الله
ربنا يخليكوا لبعض ومهما كان اللى بيحصل ففيه رصيد يشفعله عندك ويكفى كلمة السلام عليكم
وبعدين المسامح كريم
والجمل الاخيرة فيها الشفا بصراحة
ربنا يسعدكوا ويهنيكوا ومايدخل الشيطان بينكم ابدا
غريبة اوى
هو احنا عايزين ايه ؟
مين كامل ؟
مين بيكون بالظبط زى مااحنا عايزين ؟
احنا نفسنا مش عاجبين نفسنا وبنقف معها الوقفة دى كتير
الحب مالوش علاقة بالعيوب اللى بيحب لازم يحبه كدا بعبله زى ماهو
مايحاولش يغيره طالما مش بيتغير يحبه كده زى ماهو
هو دا الحب الحقيقى اللى بيبتسم على بشرية حبيبه المسكين اللى هو كمان فى وقت تانى او يمكن فى نفس الوقت بيبستم على حبيبه
احلى حاجه اخر جملتين ..
يقول انى أمرأه
حاسه بجد انك بتتكلمى عنى انا برضو بكلم نفسى كده واقول لازم الموقف ولازم فى النهايه ادفن راسى فى حضنه ونام
بس انتى عارفه برغم العيوب وانهم مبيتغيروش بس كفايه احتوئهم لينا اخر اليل واننا مش لوحدنا واكيد احنا كمان فينا عيوب مبتتغيرش
تحياتى لكى
ومن كل قلبى ربنا يهديكو لبعض
عارفة احلي حاجة في البوست دةايه انه يوصف احساس المرأة بلسان المرأة معظم الرجالة بيسمعو عن المرأة لكن مش بيسمعو منها ودة اللي عملتيه هنا عرفتيناالمرأة بلسانها تحياتي ليكي ولأسلوبك الحلو
monaliza
اللهم امين
جزاكى الله خيرا
نورتينى
حبيبتى لعلها خير
مين الى قال ان احنا خالين من العيوب
و مين الى قال انى بشتكى او مش عاجبنى
اى حاجة بتتكتب هنا فى البلوج بتبقى مجرد خاطرة او فكرة
مش شكوى خالص الحمد لله
و ادينى رديت على نفسى فى نفس البوست
بس سعات الواحد بيبقى حاجة واحدة سعات بضياقة اوى و بتفضل معلقة معاة مش معنى كدة انة مش بيحب و ممكن يعمل اى حاجة علشان الى بيحبة
هى بس فضفضة
بستنى دايما ردك
cartoz
هما فعلا فيهم الخلاصة
رهف
و كفاية احتوائهم لينا
جبتى المفيد
اسعدنى مرورك
mostafarayan
جزاك الله خيرا على الكلام الحلو
و فعلا اغلب الكتب الى بتوصف مشاعر االانثى بقلم رجل
نورتنى
عايزة اعبر بكلام كتير بس فىكلمة بتشمل كل حاجة
"دفااااااااااااااااا"
hanan
عندك حق دفا
دى من اروع الكلمات
نورتينى
ربنا يسعدكم ودايما كده تكون ما بينكم المودة والرحمة
وخلي بالك من القولون
اول مره اجي عندك
وعجبنى كلامك اوي
بس مش يمكن لو كنتى وانتى جوه حضنه وبين ضلوعه
تقوليى كده بهدوء على الى بيضايقك
كان يخفف شويه عنك
على الاقل جايز يراضيكى بكلمتين ؟
تحياتي ليكى
وحقيقى اتفاقكم جميل اوي استمروا عليه من فضلكم
Post a Comment