مونديال الشباب موسكو 98
كنت فى 2 ثانوى و خرجنا من الامتحانت على المعسكر المغلق استعدادا للمونديال
كان حدث بالنسبة لكل الوطن العربى مش مصر بس
اشتراك لعبة جماعية فى مونديال
دايما اجواء كل معسكر بتختلف على حسب البطولة
فمعسكر البطولات العربية مثلا يختلف كتير عن الافريقية فما بالكم بعالمية و لاول مرة فى تاريخ مصر
عدت مدة المعسكر الى كانت صغيرة جدا بالنسبة للاستعداد لبطولة كبيرة ذى دى بس دا حال كل الدول العربية الاكتفاء بالتمثيل المشرف و عدم بذل اى مجهود حتى من باب المحاولة
و دخلنا فى الاستعدات النهائية للحدث الكبير
الذى الرسمى و لبس الماتشات و الحجات الى فى الاوقات العادية بتبقى اجرات روتينية بس فى المرة دى كانت مختلفة احنا هنمشى فى طابور عرض مع احسن رياضين فى مصر رافعين العلم
المقتطفات
* اى رحلة مع المنتخب بتكون لازم على خطوط مصر للطيران ركبنا الاير باص و كانت كلها عليها البعثة المصرية و بس
كانت من امتع الرحلات الجوية فى حياتى طوال الطريق الناس كلها عمالة تتعرف على بعض كرة سلة , طائرة , كرة يد , سباحة , جمباز , بالية مائى , رفع اثقال , العاب قوى , ملاكمة كلة كلة و الكل كان عمال يجرى ورا بعض قى الطيارة اكننا فى استاد
* وصلنا مطار موسكو و كان فية استقبال رائع و اخدونا من المطار على مقر ادراى لقينا فية اكثر من بعثة
هناك ابتدو ياخدو احصائيات كدة عن كل لاعب و لاعبة الطول و الوزن و اسم اللعبة و حجات كدة و استلمنا هناك الاى دى الى كان ممنوع اننا نخلعو طوال تواجدنا بموسكو و الى الحقيقة كان بيفتحلنا كل الابواب و هتعرفو بعدين
* خرجنا لقينا اتوبيسات مكتوب على كل واحد اسم البلد و اللعبة المخصصة و جوا الاتوبيس اتنين امن بحاجة كدة ذى الرشاشات
اول ما ركبنا الاتوبيس و ابتدى يتحرك ابتدينا نقوم جوا الاتوبيس لكن الامن منعونا من التحرك داخل الاتوبيس قالو علشان المفايا لدواعى امنية قلقونا شوية فى البداية
* الاتوبيسات كلها عليها علم البطولة لاحظنا اننا مش بنقف فى ولا اشارة عرفنا بعد كدة ان اتوبيسات البطولة مش بتقف فى الاشارات و العربيات العادية لازم هى الى تقف علشان الاتوبيس يعدى منغير عسكرى منغير غرامة ولا حبس بجد منتهى النظام
* جميلة روسيا طوال الطريق و رغم اننا بنعدى على نفس المكان طوال ال 12 يوم الا اننا فى كل مرة كننا بنتبهر عندهم الفن المعمارى رهيب توحفة قمة الرقى و الحضارة و التراث فى ان واحد
* وصلنا للقرية الاولبية للحلم
* لقينا البعثات كلها واقفة فى طوابير اعدنا فى الاتوبيس فى انتظار دورنا
*
قبل ما نسافر اكدو علينا خدو لبس تقيل مع اننا كنا مسافرين فى الصيف و خدو اكل اصل روسيا فقيرة
* جة دورنا و نزلنا بالشنط نقف فى طابور و كانت الكومديا , الطابور كان علشان الكلاب البوليسية تلف حوالينا بالشنط قبل ما ندخل , الموضوع كان ماشى سلس جدا مع كل البعثات و جم عند البعثة المصرية الكلاب اتجننت فى الاول الناس المسؤلة مكنوش فاهمين هى بتهوهو كدة لية بس طبعا كل واحد فينا كان فاهم , اصل الشنط ملغما بعلب التونة
* مهولة هى القريةالاولبية كبيرة جداا و منظمة جداا و جميلة جدا جدا
* كانت لكل بعثة عمارة مستقلة ليها و على راس كل عمارة العلم المخصص للبلد , كانت عمارتى البرازيل و فرنسا قريبة جدا مننا
* الدنيا فى موسكو منورة طوال اليوم لغاية الساعة 12 بليل الى الساعة 3 الفجر الموضوع دة فى البداية كان عامل لينا مشكلةوالمطر مكنش بيقف خالص بس الجو كان دايما حلو
* واجهت العمارات كانت كلعا زجاج شفاف بطول الغرف طبعا لباقى الفرق الاوربية مكنتش مشكلة يغيرو ينام كدة فى الشارع عادى اما احنا فالمصرى مخترع طبعا غطينا الوجهات كلها بملايات اككنا اعدينا فى القناطر عارفين المنظر العار دة بس علشان و احننا نايمين ميكنش كل خلق الله شايفنا و كنا بنغير هدومنا فى الحمامات لان الملايات مكنتش ساترة اوى
* كاعادة ماك دونلدز هو الراعى الرسمى لكل البطولات الاولمبية بمعنى انة فاتح جوا القرية بالمجانى + مطعم اكلات عادى + بعد يومين بناء على رغبة البعثة السعودية مطعم وجبات اسلامى بمعنى اللحمة و الفراخ حلال و بدون اى مشروبات كحوولية
* و جة الليل او نقول الساعة عدت 7 مساء لان الدنيا هناك مش بتليل و دة كان احلى وقت فى اليوم الناس كلها فى باحة القرية و دايما بيبقى فية عرض فلكلور روسى و طوال ما انت ماشى عمال تخبط و تتعرف على ناس من كل دول العالم اكنك بالظبط سفرت العالم كلة مرة واحدة و تتفرج على كل الحضارات بجد وقت الليل دة كان مميز و على الساعة 11 ناس كتيرة كانت بتطلع السكن بعد كام يوم عرفنا ان اغلب البعثات المحترمة بتطلع علشان بيصحو الساعة 6 يجرو و يدخلو الجم عرفنا الكلام دة من المدرب بتاعنا و هو بيهزقنا طبعا على الانتخة و الصهر الى احنا كنا فية
* و بعد يومين كان الافتتاح كان وهمى و اللوجو بتاع البطولة كان على شكل دب بنى كدة ولان البطولة للشباب كان على هيئة دبدوب للاسف عمال ادور علية علشان احطة مش لاقية خالص على النت
* المشى فى طوابير العرض كان مميز البعثات عمالة تعدى واحدة و را التانية كلة لابس يونيفورم واحد و علم البلاد بيرفرف فى الهوا
* و احنا ماشين بمنتهى العزة ورا علمنا علم مصر كنت حاسة بخضة و اكننا فى حلم و عدا بسرعة
* ابتدت الماتشات و كان اول ماتش مع كندة خسرنا طبعا كالعادة بس باقل سكور خسارة حاجة و عشرين بونت بس فى الماتش دة انا اخت كاس الهدافة للفريق المصرى طبعا مش المباراة , انا شايفاة دلوقتى و انا بكتب على شكل لاعيبة باسكت بتشوت الكورة
* كان يوميا ماتش او تمرين و باقى اليوم خروج و شوبنج و بليل حفلة فى القرية
* كل حاجة عندهم مميزة حتى محطة مترو الانفقا توحفة ال بلد فقيرة ال دا احنا الى شحاتنين
* فى يوم رحنا حديقة حيوانات مفتوحة فى الاول كنت خايفة اوى اصل بخاف من اى حاجة متحركة تخيلو بقى ماشية جم القرود و غزال و الحجات دى
* و فى يوم رحنا مدينة الملاهى كانت بالنسبالنا اسطورة قبل ما ما دريم بارك و الحركات دى تفتح فى مصر اسطورة فعلا
* عندهم هناك نفورة فى ميدان عام كلها من الذهب كلها لمعان الذهب مع الماء يبهرك
* صحينا فى يوم على حركة غريبة فى عمارة الولاد المصرين , ككل المصرين احنا الرياضين المصرين علطول مصابين و بنلعب البطولات دى بكم رهيب من المسكنات انا عن نفسى كنت كدة و لغاية دلوقتى عندى اصابة فى رجلى الاتنين هتلازمنى العمر كلة بس ولاد المصارعة مكنوش بيخدو يظهر مسكنات عادية المهم ان الناس الى بينظفو الغرف واحدة منهم دخلت فى اديها سن حقنة من المستعملين , الدنيا قامت و مأعدتش اذاى يرمو الحقن منغير ما يحرقو السن و دكاترة بقى يكشفو على الست علشان يتاكدو انها سليمة و غرامة على البعثة المصرية و حركات مش احنا العبارة غرقت و صاحبها طلع منها يلا
* كان فية ماتش كرة يد للفريق المصرى و كان الحكم اسرائيلى اسرفت على اصابة بالغة لواحد من اللعيبة و خرج من الملعب مغمى علية و اصابة تانية لعيب تانى بطل اللعب من بعد الماتش دة دا غير ان كل الفريق طبعا خدو من الحب جانب و كانت فى نهاية الماتش مدبحة
* فى تمرين من التمارين جت فى وجهى كورة كانت قوية جدا كسرت لى جزء من سنة لدى و خرجت العدسات الاصقة من عيونى و عملتلى شرح فى عضمة انفى كانت كورة حديدة يظهر
* حسيت ان الهواء كلما مر من جانب انفى اشعر بالم شديد , فكان لازم اروح لدكتور القرية الالوبية لان للاسف احنا البعثة الوحيدة الى كان طالع معاها دكتور واحد لكل الفرق و هو كان دائما مع كرة اليد فمكنش فاضى لحد فينا كنا احنا الى بنعالج نفسنا بنفسنا و بنربط اماكن الاصابات قبل كل مبارة و دة المفروض تخصص اخصائى العلاج الطبيعى و الدكتور فى كل الفرق المحترمة
* كل فرقة كان بيبقى معاها 2 مدربين و متخصص تغذية و متخصص لياقة بدنية و دكتور الا احنا كويس ان كان فية لعبية اساسا
* تم اختيارى انا وواحدة تانية من مصر علشان منحة مجانية للدراسة و اللعب فى امريكا بس منفعش علشان كان لسا فاضل ليا عام فى ثانوى جتلى منحة بعد كدة فى الجامعة نبقى نحكى عنها بعدين
* و احنا هناك كان نهائى كاس العالم ما بين فرنسا و البرازيل و اصبحت القرية سكنه عسكرية منقصمة ما بين الفريقين و اعلام البدلين كانت مغرقة الدنيا حسيت انى جوا الاستاد بتفرج على الماتش وقتها
* اتعرفنا على ناس كتيرة اوى و كان اخر يومين بجد صعبين اوى اوى علينا
* خلصت البطولة و حافلة الختام و ابتديت الفرق فى الرحيل و عملنا جولة فى روسيا حاولت اختزن فى ذاكرتى اكبر قدر من الذكريات موجودة دايما لكنها بتتجدد و بقوة كل اربع سنوات مع كل مونديال جديد
* مصر مش بتحقق حاجة مش عيب فى مصر ولا فى الرياضين بالعكس العيب فى السياسة العامة للرياضة فى مصر الى هى جزء لا يتجزء من سياسة الحكومة المصرية عموما , كل البعثات استعدت لمدة 4 سنوات للمونديال الا احنا شهر قبلة و كنا كلنا مبطلين تمارين لمدة حوالى شهر علشان الثانوية العامة
* من اول يوم و الكلمة الشهيرة احنا مش هنعمل حاجة بس عايزين شكلنا يبقى حلو طب لية الاحباط محنا نحاول
* الفريق مكون من 12 لاعبة 6 او 7 بس الكويسين و الباقى وسايط مهى رحلة بقى و فسح نرضى كل الناس المهم ناخد كام بنت يعرفو يلعبو علشن المنظر علشان كدة الاصابات كانت رهيبة لان مينفع تتصاب و تقعد مفيش غيرك الباقى طالع يتفسح
* فية مثل انجليزى مشهور فى الرياضة معناة ان الالم علامة للتوقف دة عند كل الناس الا احنا ممكن رجليك تكون مكسورة بس هتلعب غصب عنك و النتيجة زى كدة اصابة طوال عمرى
* اذاى تطلب من لعيب بيحارب جوا النادى بتاعة و مع الاتحاد تبعة الى المفروض يوفرو لية الراحة انة يحقق نتيجة
* اذاى تطلب من لعيبة فى العاب ذى الملاكمة و رفع الاثقال و العاب القوى مثلا دى الرياضات فى مصر الى اغلب الى بيلعبوها مستوهم فقير انة يوكن كويس و هو مش بياكل وجبة صحية فى حين ان باقى العالم فية دكاترة خاصة بالتغذية
* كان عندنا ماتش مع اليابان قلنا بس دول قصيرين اوى هنتحنهم , كانت اخر حاجة شفناها ركب , طوال طول رهيب و سالنا عرفنا انها بيجهزوهم من الصغير علشان يكونو لاعيبة باسكت
* اغلب الرياضين المصرين بيشربو كل حاجة ممكن تتشرب مقصدش بيبسى طبعا بس ابتداء من السجاير و كل انواع الخمور و المخدرات علشان كدة بيشحرو بسرعة فى الملعب و عمرهم قصير
* علشان تكون لاعيب كويس فى مصر اما يبقى ابوك حد فى الاتحاد الى انت تابعة او حد مهم اوى فى الدولة او ان ابوك يبقى سارف بنك و امك رقاصة علشان تلعب لعبة فردية و تصرف على نفسك و تسافر بطولات على حسابك من فلوس ابوك
* الرياضة المصرية و العربية بعافية كاحوال البلدان العربية اتمنى ان ينصلح الحال و الى عايز يتفرج على رياضة بجد يتفرج على المونديال
شكلنا بقى وحش اوى اوى يا 
